ज्ञानमाण्डू।कैलालीको टीकापुरमा विमानस्थल सञ्चालनका लागि नेपाल नागरिक उड्डयन प्राधिकरणको टोलीले अध्ययन सुरु गरेको छ । प्राधिकरणका निर्देशक र परामर्शदाताका टोलीले शनिवार टीकापुर विमानस्थलकोे स्थलगत अध्ययन गरेको छ । प्राधिकरणका निर्देशक रत्नबहादुर श्रेष्ठले स्थलगत अध्ययन टोलीले टीकापुर विमानस्थलको अवस्था राम्रो देखिएको बताए । “अब प्राविधिक टोलीले पूर्वसम्भाव्यता अध्ययन र विस्तृत अध्ययन गरिसकेपछि प्रक्रिया अगाडि बढ्छ”, श्रेष्ठले भने , “त्यसअघि स्थानीय सर्वपक्षीय सहमति आवश्यक रहेको छ ।”
टीकापुरमा विमानस्थल निर्माणको काम अन्तर्राष्ट्रिय नागरिक उड्डयन सङ्गठन (आइकाओ) को मापदण्ड अनुसार हुने छ । आइकाओको मापदण्डअनुसार एक हजार ८०० मिटरभन्दा लामा हवाई मैदानको चौडाइ पनि ३२० मिटर हुनुपर्नेछ तर टीकापुरमा रहेको विमानस्थलको क्षेत्रफल एक हजार दुई सय मात्र भएका कारण हवाई उडान गर्न कठिनाइ हुने भन्दै विमानस्थलको जग्गा गौचरनमा परिणत भएको छ ।
टीकापुरमा स्थानीय सरकार, टीकापुर उद्योग वाणिज्य सङ्घलगायतले टीकापुर विमानस्थल निर्माणका लागि संस्कृति, पर्यटन तथा नागरिक उड्डयन मन्त्री योगेशकुमार भट्टराईलाई गत महिना सम्पन्न टीकापुर महोत्सवमा प्रमुख अतिथि बनाएर एक विमानस्थल बनाउन एक सूत्रीय माग राखेको थियो । मन्त्री भट्टराईले टीकापुरका जनताले जमिन उपलब्ध गराए सरकारले विमानस्थल बनाउने आश्वासन दिएका थिए ।
हालको टीकापुर विमानस्थल रहेको जमीनको क्षेत्रफल कम भएका कारण देखाउँदै उडान भर्न नसकेको अवस्थामा टीकापुर नगरपालिकाले खेलकूदका लागि छुट्ट्याएको जमीनलाई विमानस्थल र विमानस्थलकोे जमीनलाई खेलकूद मैदान बनाउने सर्वपक्षीय बैठकबाट पारित भइसकेको छ ।
नगर प्रमुख तपेन्द्रबहादुर रावलले खेलकूदको जमिन विमानस्थलका लागि पर्याप्त हुन्छ भन्दै आफूहरू विमानस्थल सञ्चालनका लागि लागिपरेको बताए । उनले विगतमा सुकुम्वासीले कब्जा गरेर बसेको विमानस्थल खाली गराउन सफल भए पनि धावन मार्ग कम भएका कारण हवाई उडान गर्न नसकिएको बताउँदै प्राधिकरणको टोलीले हालको खेलकूदको जग्गा विमानस्थल सञ्चालनका लागि उत्तम रहेको जिकिर गरेका छन् । टीकापुरमा विमानस्थल सञ्चालन भए कैलालीको पूर्वी भाग र बर्दिया जिल्लाका बासिन्दालाई सहज हुने देखिन्छ ।रासस
