भदौ १० गते रसुवाको भोटेकोशी नदीमा आएको विनाशकारी बाढीका कारण रसुवा, नुवाकोट, धादिङ, गोरखा तथा चितवन लगायतका नदी तटीय क्षेत्रमा ठुलो मात्रामा मानवीय तथा भौतिक क्षति भएको दुःखद घटनाप्रति आईएमई लाइफ इन्स्योरेन्स कम्पनी लिमिटेडले गहिरो दुःख व्यक्त गरेको छ।
भीषण बाढी र डुबानका कारण सयौँ नागरिकको अकालमै ज्यान गुमाउनुपरेको, कैयौँ बेपत्ता भएको, बस्ती तथा पूर्वाधारहरू नष्ट भई सयौँ परिवार विस्थापित हुनुपरेको यस कठिन परिस्थितिमा कम्पनीले प्रभावित नागरिकहरूप्रति हार्दिक सहानुभूति व्यक्त गरेको छ।
विपद्बाट प्रभावित नागरिकहरूको तत्कालीन उद्धार, राहत तथा दीर्घकालीन पुनर्स्थापनाका लागि नेपाल सरकार, सुरक्षा निकाय र स्थानीय सङ्घ-संस्थाहरूबाट भइरहेका प्रयासप्रति ऐक्यबद्धता जनाउँदै आईएमई लाइफ इन्स्योरेन्स कम्पनी लिमिटेडले संस्थागत सामाजिक उत्तरदायित्व (CSR) अन्तर्गत ‘प्रधानमन्त्री दैवी प्रकोप उद्धार कोष’ मा रु. १ करोड (एक करोड रुपैयाँ) आर्थिक सहयोग प्रदान गर्ने घोषणा गरेको छ।
कम्पनीले स्थापनाकालदेखि नै राष्ट्रमा आइपर्ने विभिन्न सङ्कट, प्राकृतिक विपद् तथा महामारीको घडीमा अग्र पङ्क्तिमा रहेर सहयोग हस्तान्तरण गर्दै आइरहेको छ। हालको विषम परिस्थितिमा कम्पनीको तर्फबाट उपलब्ध गराउने यो आर्थिक सहयोगले बाढी प्रभावितहरूको खोज, उद्धार, खानपान, स्वास्थ्य उपचार तथा पुनः स्थापना कार्यमा थप मद्दत पुग्ने विश्वास व्यक्त गरिएको छ।
आईएमई लाइफ इन्स्योरेन्स कम्पनी लिमिटेड यस दुःखद घडीमा बाढीमा परी ज्यान गुमाउने नागरिकहरूप्रति हार्दिक श्रद्धाञ्जली व्यक्त गर्दै शोक सन्तप्त परिवारजनमा गहिरो समवेदना प्रकट गर्दछ। साथै, बेपत्ताहरूको शीघ्र खोजी, घाइतेहरूको शीघ्र स्वास्थ्य लाभको कामना गर्दै उद्धार तथा राहत कार्यमा अहोरात्र खटिनुभएका सम्पूर्ण सुरक्षाकर्मी, स्वयंसेवक तथा सम्बन्धित निकायहरूप्रति उच्च सम्मान एवं आभार व्यक्त गर्दछ।
आईएमई लाइफ इन्स्योरेन्स कम्पनी लिमिटेड द्वारा बाढीपीडितको राहत तथा पुनर्स्थापनाका लागि प्रधानमन्त्री दैवी प्रकोप उद्धार कोषमा रु. १ करोड सहयोगको प्रतिबद्धता
यो खबर पढेर तपाईलाई कस्तो महसुस भयो ?
0%
0%
0%
0%
0%
0%
