ज्ञानमाण्डू।फिफा विश्वकपका लागि दोस्रो चरणको छनोटको पहिलो खेलमा कुवेतसँग नेपाल पराजित भएको छ । गए राति कुवेतस्थित अल अहमद अन्तर्राष्ट्रिय रङ्गशालामा भएको खेलमा नेपाल कुवेतसँग ७–० ले पराजित भएको छ । पहिलो हाफमा दुई गोल खाएको नेपालले दोस्रो हाफमा पाँच गोल खाए पश्चात् पनि नेपालले जवाफमा एक गोल पनि फर्काउन नसक्दा हार बेहोर्नु परेको हो । फिफा बरीयतामा नेपालभन्दा कुवेत मात्र चार स्थान माथि भएता पनि नेपालले अहिलेसम्म कुवेतलाई हराउन सकेको छैन ।
कुवेतका लागि युसेफ नासिरले खेलको छैटौँ मिनेटमा गोल गर्दै घरेलु टोलीलाई सुरुवाती अग्रता दिलाएका थिए । त्यस्तै खेलको १३ औँ मिनेटमा फहाद अल हजेरीले गोल गर्दै कुवेतको अग्रता दोब्बर पार्न सफल भए । यही दुई गोल सँग कुवेतले पहिलो हाफ सम्म आफ्नो अग्रता बनाउन सफल रह्यो ।
दोस्रो हाफसँगै खेलको ५० औँ मिनेटमा नासिरले व्यक्तिगत दोस्रो गोल गर्दै कुवेतलाई ३–० गोलको अग्रता दिलाए । कुवेतका लागि अब्दुल्हा मोहीले खेलको ५९ औँ मिनेटमा गोल गर्दै कुवेतलाई जिततर्फ अगाडी बढाए ।
खेलको बडेर अल मुटवा ६७ औँ मिनेटमा गोल गर्दै घरेलु टोलीलाई ५–० को अग्रता दिलाए । निकै नै आक्रामक भएको कुवेतका लागि खेलको इन्ज्यूरी समयमा रेड हनीले गोल गर्दै कुवेतलाई ६–० को अग्रता दिलाए । हुसेन अल मुसावीले खेलको अन्तिम र निर्णायक गोल गर्दै ७–० गोलको सहज जित दिलाए ।
यस जितसँगै कुवेत समूहको शीर्षस्थानमा उक्लिएको छ । यसअघि समूहको अर्को खेलमा जोर्डनले चाइनिज ताइपेइलाई २-१ ले पराजित गरेको थियो । नेपालले अब अर्को खेलमा मङ्गलवार चाइनिज ताइपेइसँग खेल्नेछ । अर्को खेलमा सोही दिन कुवेत र अस्ट्रेलिया भिड्नेछन् ।
