चन्द्रागिरि भालेश्वरमा विशेष सन्ध्या आरती

काठमाडौँको चन्द्रागिरिमा अवस्थित भालेश्वर महादेवमा आज साँझ विशेष सन्ध्या आरती सम्पन्न भएको छ । साउन महिनाको पहिलो सोमबार आज यहाँ पहिलो पटक यस प्रकारको आरतीको आयोजना गरेको हो ।

साउनको हरेक सोमबार साँझ चन्द्रागिरि हिल्स मन्दिर व्यवस्थापन समितिले यसै गरी भालेश्वर महादेवमा पूजाआजाका साथै साँझ विशेष सन्ध्या आरतीको आयोजना गर्ने चन्द्रागिरि हिल्स लिमिटेडका महाप्रबन्धक सन्जिब थापाले बताउनुभयो ।

भालेश्वर महादेवमा आज चन्द्रागिरि केबलकार चढेर हजारौँ श्रद्धालु पूजाका साथै साँझको आरतीमा सहभागी हुन पुगेका थिए ।

आज साउन महिनाको पहिलो सोमबार पशुपतिनाथसहित देशका अन्य महादेव मन्दिरहरूमा पनि भगवान् शिवको पूजा अर्चनाका लागि घुइँचो लागेको थियो ।