ज्ञानमाण्डू।सन्तोष साहुखलले ‘ए’ डिभिजन लिगमा एक सय गोल पूरा गर्न सफल भएका छन् । शहीद स्मारक ‘ए’ डिभिजन लिग फुटबल प्रतियोगिता अन्तर्गत त्रिपुरेश्वरस्थित दशरथ रङ्गशालामा उनले आजको खेलमा १००औँ गोल गरेका हुन् ।
सन्तोषले च्यासल युथ क्लबका तर्फबाट नेपाल पुलिस क्लबका विरुद्ध खेलको १८औँ मिनेटमा गोल गरेका थिए । ‘ए’ डिभिजन लिगमा एक सय गोल गर्ने सन्तोष पहिलो खेलाडी बनेका छन् ।
च्यासलका हेमन्त थापामगरले हानेको फ्रिकिक पुलिसका गोलकिपर शत्रुघन चौधरीले रोक्न नसक्दा उक्त बललाई सन्तोषले गोलमा परिणत गर्न सफल भएका थिए । पहिलो हाफसम्ममा नेपाल पुलिस क्लबले दुई तथा च्यासलले एक गोल गरेको छ । जारी लिगमा उनको यो चौथो गोल हो । उनले पहिलो खेलमा सङ्कटा क्लब विरुद्ध दुई तथा दोस्रो खेलमा मच्छिन्द्र क्लब विरुद्ध एक गोल गरेका थियो । उनले न्यु रोड टिम र जाउलाखेल युथ क्लब विरुद्धको खेलमा भने गोल गर्न सकेनन् । सन्तोषले २०६० सालमा थ्री स्टार क्लबबाट लिग खेल्न थालेका हुन् ।रासस
