सामलिङ्ग पावर कम्पनी लिमिटेडले यही पौष २१ गते (आज) चौथो वार्षिक साधारण सभा गर्दै छ। कम्पनीले साधारण सभा ज्वागल ब्याङ्केट, ललितपुरमा बिहान ११:०० बजे देखि आरम्भ हुने जानकारी दिएको छ।
सभाले सञ्चालक समितिको आर्थिक वर्ष (आ.व) २०७८/०७९ को वार्षिक प्रतिवेदन उपर छलफल गरी पारित गर्ने छ, त्यसै गरी लेखापरीक्षककाे प्रतिवेदन सहितको आ.व २०७८/०७९ को वार्षिक विवरण उपर छलफल गरी पारित गर्ने र आ.व २०७९/०८० को लागि लेखा परीक्षक नियुक्त गर्ने र निजको पारिश्रमिक तोक्ने प्रस्ताव पनि सोही सभाले पारित गर्ने कम्पनीले जनाएको छ ।
सभाले आयोजनाको अन्तिम लागत र सो लागत बमोजिमको बैङ्कको ऋण लगानी रकम अनुमोदन गर्ने प्रस्ताव पारित गर्नेछ ।
कम्पनीको हाल कायम रजिस्टर्ड कार्यालयको ठेगाना परिवर्तन गरी नयाँ ठेगाना कायम गर्न प्रबन्ध पत्र र नियमावलीमा संशोधन गर्ने सम्बन्धी विशेष प्रस्ताव पनि सोही सभाले पारित गर्नेछ ।
कम्पनीले साधारण सभाको प्रयोजनको लागि पौष ०७ गते एक दिनको लागि बुक क्लोज गरिसकेको छ। सो आधारमा पौष ०६ गतेसम्म कायम शेयरधनीले वार्षिक साधारण सभामा भाग लिन सक्नेछन् ।
