महालक्ष्मी विकास बैङ्कले ३२ औँ वर्षमा प्रवेश गरेको अवसरमा मिति २०८३\०२\०२ गते देखी २०८३\०२\०७ गते सम्म वार्षिक उत्सव मनाउने क्रममा विभिन्न कार्यक्रमहरू सम्पन्न गरेको छ ।

वार्षिक कार्यक्रम अन्तर्गत मिति २०८३\०२\०२ गते बैङ्कको केन्द्रीय कार्यालय, प्रादेशिक कार्यालयहरू तथा शाखा कार्यालयका कर्मचारीहरूको सहभागितामा वित्तीय साक्षरता सहितको प्रभात फेरी कार्यक्रम सम्पन्न गरेको छ । विभिन्न स्थानहरूमा गरिएको वित्तीय साक्षरता कार्यक्रममा बैंकिङ्ग सेवाहरुः जस्तै मोबाइल बैंकिङ्ग, स्मार्ट क्युआर, निक्षेप, कर्जा, विप्रेषण आदिसँग सम्बन्धित विषयवस्तुहरू समेटिएको थियो ।

साथै मिति २०८३\०२\०४ गते बैङ्कको केन्द्रीय कार्यालयमा बृहत् निःशुल्क स्वास्थ्य शिविर तथा मिति २०८३\०२\०५ गते निःशुल्क दन्त तथा आँखा शिविर समेत सञ्चालन गरेको छ । उक्त शिविरहरूमा करिब २०० जना व्यक्तिहरूको स्वास्थ्य, आँखा तथा दाँतको परीक्षण गरिएको थियो । यसका साथै बैङ्कले वार्षिकोत्सवको अवसरमा ज्येष्ठ ६ गते देश भरका विभिन्न प्रादेशिक कार्यालय र बैङ्कको केन्द्रीय कार्यालयमा बृहत् रक्तदान कार्यक्रम सम्पन्न गरेको छ । उक्त रक्तदान कार्यत्रमहरु मार्फत २०० पिन्ट रगत सङ्कलन गरिएको थियो ।

स्वास्थ्य क्षेत्रमा चुनौतीको रूपमा रहेको रगत व्यवस्थापनमा सहजता होस् भन्ने उद्देश्यले बैङ्कले ३२ औँ वार्षिकोत्सवको अवसर पारेर रक्तदान कार्यक्रमहरू सञ्चालन गरेको हो । सोही दिन बैङ्कले संसृतकी प्रवर्द्धन तथा मन्दिर सर सफाइलाई प्राथमिकतामा राखी विभिन्न स्थानमा रहेका महालक्ष्मी मन्दिरहरूमा सरसफाइ लगायतका सामाग्रीहरू हस्तान्तरण गरेको छ । साथै ललितपुर महालक्ष्मी स्थानमा रहेको महालक्ष्मी मन्दिरमा बगैँचा प्रवर्द्धन मर्मत सम्भार तथा डिजिटल दक्षिणा भुक्तानी प्रवर्द्धनको लागि समेत बैङ्कले सहयोग गरेको छ ।

साथै बैङ्कले ज्येष्ठ ७ गते बिहीबार केन्द्रीय कार्यालय, प्रादेशिक कार्यालय तथा शाखा कार्यालयहरू मार्फत देशको भौगोलिक र सांस्कृतिक अवस्थाको उजागर गर्न कर्मचारीहरूलाई स्थानीय भेष भूषा सहितको पहिरनमा उपस्थित भई सम्बन्धित भेसभुसाको प्रहसन समेत गरेको थियो । सोही दिन नारायणहिटी नाराण स्थान गुठी व्यवस्थापन समिति, नारायणहिटीलाई खानेपानी व्यवस्थापनको लागि पानी ट्याङकी हस्तान्तरण गरिएको छ ।

अगस्ट १९ मा मनाइने विश्व फोटोग्राफी दिवसको अवसरमा महालक्ष्मी विकास बैङ्कले स्थानीय साना तथा मझौला व्यापारहरूको प्रवर्द्धन तथा प्रचारप्रसार गर्ने उद्देश्यका साथ हरेक वर्ष आयोजना गर्दै आएको “महालक्ष्मी विकास बैङ्क बिजचित्र फोटोग्राफी प्रतियोगिता” मा सङ्कलन गरिएका फोटोहरू समेत बैङ्कको केन्द्रीय कार्यालयमा प्रदर्शन गरिएको छ । वार्षिक उत्सवको महत्त्वपूर्ण कार्यक्रमको रूपमा रहेको र विगत ४ वर्षदेखि सफलतापूर्वक सञ्चालन गरिएको महालक्ष्मी कर्पोरेट त्रिक्रेटको पाँचौँ श्रृङखला समेत यहीँ ज्येष्ठ महिनामा बैङ्कले सञ्चालन गर्नेछ ।