लुम्बिनी जनरल इन्स्योरेन्स कम्पनी लिमिटेडले यही फाल्गुन ११ गते (आज) १८ औँ वार्षिक साधारण सभा गर्दै छ। कम्पनीले साधारण सभा अमृतभाेग क्याटरिङ्ग, कालिकास्थान, डिल्लीबजार, काठमाडौँमा बिहान १०:०० बजे देखि आरम्भ हुने जानकारी दिएको छ।
सभाले सञ्चालक समितिको तर्फबाट अध्यक्षज्यूबाट पेस हुने आर्थिक वर्ष (आ.व) २०७८/०७९ को वार्षिक प्रतिवेदन उपर छलफल गरी पारित गर्ने छ । त्यसै गरी लेखापरीक्षककाे प्रतिवेदन सहितको आ.व २०७८/०७९ को वार्षिक विवरण उपर छलफल गरी पारित गर्ने र आ.व २०७९/०८० को लागि लेखापरीक्षक नियुक्त गर्ने र निजको पारिश्रमिक तोक्ने प्रस्ताव पारित गर्ने छ ।
त्यसै गरी सभाले सञ्चालक समितिले प्रस्ताव गरे बमोजिम चुक्ता पुँजीको ६.९९ प्रतिशतका दरले हुन आउने रकम रु. ९ करोड १७ लाख ६४ हजार ४५० रुपैयाँ बराबरको बोनस शेयर र ०.३६७९ प्रतिशतका दरले हुन आउने रकम रु. ४८ लाख २९ हजार ७०८ रुपैयाँ बराबरको नगद लाभांश (कर प्रयोजनसहित) वितरणको प्रस्ताव पनि सोही सभाले पारित गर्ने छ ।
सभाले यस लुम्बिनी जनरल इन्स्योरेन्स कम्पनी लिमिटेड र सगरमाथा इन्स्योरेन्स कम्पनी लिमिटेड एक आपसमा गाभिए पश्चात् सगरमाथा लुम्बिनी इन्स्योरेन्स कम्पनी लिमिटेडमा सगरमाथा इन्स्योरेन्स कम्पनी लिमिटेडको हाल कायम १०० कित्ता बराबर १०० कित्ता र लुम्बिनी जनरल इन्स्योरेन्स कम्पनी लिमिटेडको हाल कायम १०० कित्ता बराबर ८० कित्ता शेयर कायम हुने गरी स्वाप रेसियो १००:८० लाई स्वीकृत गर्ने प्रस्ताव पारित गर्नेछ ।
कम्पनीले साधारण सभाको प्रयोजनको लागि माघ २७ गते एक दिनको लागि बुक क्लोज गरिसकेको छ। सो आधारमा माघ २६ गतेसम्म कायम शेयरधनीले साधारण सभामा भाग लिन सक्नेछन् ।
