काठमाडौँ महानगरपालिकाले चालु आर्थिक वर्षको पहिलो चौमासिकमा रु दुई अर्ब ९२ करोड ९६ लाख नौ हजार राजस्व असुल गरेको छ ।
उक्त रकम गत आवको सोही अवधिको भन्दा रु १७ करोडले बढी हो । का.म.न.पा.ले गत आ.व.को पहिलो चौमासिकमा रु दुई अर्ब ७५ करोड ९८ लाख ६४ हजार राजस्व असुल गरेको का.म.न.पा.को राजस्व विभागका प्रमुख धुव्र काफ्लेले जानकारी दिनुभयो । उहाँका अनुसार चालु आवको चार महिनामा सबैभन्दा धेरै घर बहाल कर रु ८१ करोड ९२ लाख र सम्पत्ति कर रु ४१ करोड ८६ लाख असुल भएको छ ।
का.म.न.पा.ले चालु आवका लागि रु १० अर्ब ८० करोड राजस्व असुलको लक्ष्य लिएको छ । पछिल्लो समय का.म.न.पा.मा बहाल कर तिर्ने करदाता बढेकाले राजस्व रकम बढेको विभागका प्रमुख काफ्लेको भनाइ छ । “गत वर्षभन्दा यस वर्ष सम्पत्ति करमा मात्रै छ सय ४८ करदाता बढेका छन् । बहाल करतर्फ पनि करदाता उल्लेख्य रूपमा बढेका छन्”, उहाँले भन्नुभयो, “पछिल्लो समय एक हजार तीन सय करदाता थपिएका छन् ।”
अहिले का.म.न.पा.मा तीन लाखभन्दा बढी करदाता रहेका काफ्लेले जानकारी दिनुभयो । राजस्व सङ्कलनको काम वडा कार्यालयबाटै हुन थालेसँगै पछिल्लो समय लामो समयदेखिको बक्यौता रकमसमेत उठ्न थालेको उहाँले बताउनुभयो ।का.म.न.पा.ले ३२ वटै वडा कार्यालयबाट राजस्व सङ्कलन गर्न थालेसँगै लामो समयदेखि असुलउपर हुन नसकेको बक्यौता रकम उठ्न थालेको काफ्लेको भनाइ छ ।
लामो समयदेखि उठ्न नसकेको बक्यौता रकम जरिवानाको कारण तिर्न आनाकानी गरिरहेका करदाताका लागि आगामी पुस मसान्तसम्म जरिवाना रकममा छुट दिएकाले राजस्व संलग्नमा थप सहज भएको छ ।
यसअघि राजस्व तिर्नका लागि वार्षिक तीन लाखसम्म सम्बन्धित वडा कार्यालय र त्यसभन्दा बढीका लागि का.म.न.पा.को केन्द्रमा आउनुपर्ने व्यवस्था रहेको राजस्व विभाग प्रमुख ध्रुव काफ्लेले बताउनुभयो । उहाँका अनुसार हाल का.म.न.पा.ले सम्पत्ति, बहाल, मनोरञ्जन, व्यवसाय, विज्ञापन करलगायत नौ शीर्षकमा कर सङ्कलन गर्दै आएको छ ।
पहिलो चौमासिकमा का.म.न.पा.को राजस्व करिब तीन अर्ब
यो खबर पढेर तपाईलाई कस्तो महसुस भयो ?
0%
0%
0%
0%
0%
0%
