स्वावलम्बन लघुवित्त वित्तीय संस्था लिमिटेडले फाल्गुन १९ गते (आज) २१ औँ वार्षिक साधारण सभा गर्दै छ। कम्पनीले साधारण सभा लैनचौर ब्यान्क्वेट, काठमाडौँमा बिहान १०:३० बजे देखि आरम्भ हुने जानकारी दिएको छ।
सभाले सञ्चालक समितिको तर्फबाट अध्यक्षबाट पेस हुने आर्थिक वर्ष (आ.व) २०७८/०७९ को वार्षिक प्रतिवेदन उपर छलफल गरी पारित गर्ने छ । त्यसै गरी लेखापरीक्षककाे प्रतिवेदन सहितको आ.व २०७८/०७९ को वार्षिक विवरण उपर छलफल गरी पारित गर्ने र आ.व २०७९/०८० को लागि लेखापरीक्षक नियुक्त गर्ने र निजको पारिश्रमिक तोक्ने प्रस्ताव पारित गर्ने छ ।
त्यसै गरी सभाले सञ्चालक समितिले प्रस्ताव गरे बमोजिम चुक्ता पुँजीको १५ प्रतिशतका दरले हुन आउने रकम रु. १६ करोड ८३ लाख २५ हजार ५०० रुपैयाँ बराबरको बोनस शेयर र ६.०५२६ प्रतिशतका दरले हुन आउने रकम रु. ६ करोड ७९ लाख २० हजार ८१६ रुपैयाँ बराबरको नगद लाभांश (कर प्रयोजनसहित) वितरणको प्रस्ताव पनि पारित गर्ने छ ।
सभाले संस्थापक शेयरलाई १० प्रतिशत बिन्दुले सर्वसाधारणमा परिणत गरी हालको शेयर संरचना संस्थापक शेयर ७० प्रतिशत र सर्वसाधारण शेयर ३० प्रतिशतलाई क्रमशः संस्थापक शेयर ६० प्रतिशत र ४० प्रतिशत सर्वसाधारण शेयर कायम हुने गरी शेयर संरचना परिवर्तन गर्ने सम्बन्धी विशेष प्रस्ताव पनि पारित गर्नेछ ।
कम्पनीले साधारण सभाको प्रयोजनको लागि फाल्गुन १० गते एक दिनको लागि बुक क्लोज गरिसकेको छ तर फागुन ९ गते ल्होसारको सार्वजनिक बिदाका कारण फाल्गुन ०८ सम्म कायम शेयरधनीहरुले मात्र वार्षिक साधारण सभामा भाग लिन सक्नेछन् ।
