ज्ञानमाण्डू।प्रदेश नं ५ सरकारले दुई वर्षभित्र पश्चिम नवलपरासीका विभिन्न स्थानमा पाँच वटा ठुला मोटरेबल पुल निर्माण गर्ने भएको छ ।
यसका लागि झन्डै आधा अर्ब बजेट विनियोजन गरिएको प्रदेशका भौतिक पूर्वाधार विकास मन्त्री बैजनाथ चौधरीले जानकारी दिए । रामग्राम र सुनवल नगरपालिकाका विभिन्न स्थानमा बन्ने ती पुलमध्ये तीनवटाकोे शिलान्यास तयारी भएको जनाइएको छ । सुनवलको बेलारी खोला, वनकट्टी र छडेनी जोड्ने झरही खोला तथा रामग्रामको देउरवा र रामग्राम स्तूप जोड्ने झरही खोलामा पुल बन्दै छन् । यसको ठेक्का प्रक्रिया सम्पन्न भई सकेका छन् । अन्य दुई वटा पुल पनि ठेक्का प्रक्रियामा रहेकाले चैतमा शिलान्यास हुने उनले बताए ।
उनका अनुसार रामग्राम नगरपालिका–७ स्थित देउरवा गाउँ र गौतम बुद्धको अस्तुधातु रहेको स्थल रामग्राम स्तूप जोड्ने गरी झरही खोलामा पुल निर्माण हुनेछ । यो पुलले रामग्राम नगरपालिकाको वैकुण्ठपुरदेखि उजैनी गाउँलाई जोड्नेछ । यहाँ पुल निर्माण भएपछि पूर्वपश्चिम राजमार्गको हरकट्टादेखि सिधै रामग्राम स्तूप पुग्न सहज हुने मन्त्री चौधरीले जानकारी दिए । यहाँ पुल नहुँदा बर्सातको समयमा स्थानीय देउरवा गाउँका बासिन्दालाई सदरमुकाम परासी आवतजावत गर्न तथा उजैनी गाउँमा अध्ययन गर्न आउन–जानका लागि विद्यार्थीलाई समस्या रहेको स्थानीयवासी शम्भु उपाध्यायले जानकारी दिए ।
“वर्षांदेखि यहाँ पुल नहुँदा हामीलाई धेरै समस्या थियो, विद्यार्थी पढाइ नै छोडेर बस्नुपर्ने अवस्था पनि छ, किनमेल तथा अन्य कामका लागि पनि वैकल्पिक लामो दुरी यात्रा गर्नुपर्ने बाध्यता थियो, अहिले पुल निर्माण हुन लागेपछि यहाँ खुशियाली नै छाएको छ”, उनको भनाइ छ । ३५ मिटर लम्बाइको उक्त पुल निर्माणका लागि भ्याटसहित रु ६ करोड ६२ लाखमा एम/एस आसियाटिक र प्रदीप जुम्ली जेभी कम्पनीले निर्माणको जिम्मा पाएको छ ।
रामग्राम नगरपालिकाकै घिनाहा र शुक्रौली जोड्ने गरी तुरिया खोलामा पनि मोटरेबल पुल निर्माण हुँँदैछ । यहाँ पुल निर्माणका लागि रु १२ करोड बजेट विनियोजन गरिएको छ । पुल निर्माणका लागि ठेक्का प्रक्रिया सुरु भइसकेको जनाइएको छ ।
यस्तै सुनवलमा तीन वटा पुल निर्माण हुनेछन् । सुनवल बजारदेखि पर्यटकीय स्थल महलपोखरी जोड्ने गरी बेलारी खोलामा मोटरेबल पुल निर्माण हुनेछ । यो पुलका लागि रु एक करोड ५० लाख बजेट विनियोजन गरिएको छ । यहाँ पुल निर्माण भएपछि स्थानीय बासिन्दालाई सुनवल बजार आवत–जावत गर्न तथा महलपोखरी पुग्ने पर्यटकलाई सहज हुने सुनवल नगर उपप्रमुख दधिराम अर्यालले जानकारी दिए । यो पुलले नवलपरासी र पाल्पाको पहुँचलाई पनि विस्तार गर्नेछ ।
सुनवलकै वनकट्टी र छडेनी जोड्ने गरी झरही खोलामा पुल निर्माण हुनेछ । यसका लागि रु तीन करोड बजेट विनियोजन गरिएको जनाइएको छ । यहाँ पुल निर्माण भएपछि वनकट्टीका बासिन्दालाई परासी आवत–जावत गर्न तथा छडेनीका बासिन्दालाई सुनवल नगरपालिका आउन–जान सहज हुनेछ भने छडेनीबाट वनकट्टी पढ्न जाने विद्यार्थीलाई सहज हुनेछ ।
पुल नहुँदा बर्सातको समयमा वनकट्टी पढ्न जानुपर्ने विद्यार्थी तीन महिना पढाइबाटै वञ्चित हुनु परेको बताउँदै स्थानीयवासी लतिदुन नेसाले भने, “ अहिले हामी धेरै खुसी छौँ, अब यी समस्या समाधान हुने आस छ ।”
प्रदेश सरकारले यसै वर्ष सुनवलको खुटहट र रामग्रामको डैनहवा जोड्ने गरी तुरिया खोलामा पनि पुल निर्माण गर्ने जनाएको छ । यो पुलका लागि पनि रु १२ करोड बजेट विनियोजन गरिएको मन्त्रालयले जनाएको छ ।रासस
