बागमती प्रदेश सरकारले चालु आर्थिक वर्ष २०८१/८२ को नौ महिनामा कुल बजेटको ३२.५१ प्रतिशत मात्र खर्च गर्न सकेको छ। आन्तरिक मामिला तथा योजना मन्त्रालयका सूचना अधिकारी इन्द्रराज सञ्ज्यालका अनुसार साउनदेखि चैतसम्मको अवधिमा प्रदेश सरकारले २० अर्ब ९८ करोड १४ लाख ६६ हजार रुपैयाँ खर्च गरेको हो।
यस अवधिमा पुँजीगत बजेटतर्फ २८.२४ प्रतिशत मात्र खर्च भएको छ भने चालु खर्चतर्फ ४०.५१ प्रतिशतको प्रगति देखिएको छ। खर्च गरिएको कुल बजेटमध्ये पुँजीगततर्फ १० अर्ब ४९ करोड ७ लाख ११ हजार र चालु तर्फ १० अर्ब ४९ करोड ७ लाख ५५ हजार रुपैयाँ खर्च भएको मन्त्रालयले जनाएको छ।
प्रदेश सरकारले चालु आर्थिक वर्षका लागि ६४ अर्ब ५४ करोड ४ लाख ३१ हजार रुपैयाँको बजेट विनियोजन गरेको थियो। तर, चालु खर्चमा तुलनात्मक रूपमा उच्च प्रगति देखिए पनि पुँजीगत खर्च अपेक्षाभन्दा निकै कम देखिएको छ।
बजेट खर्चको सन्दर्भमा सबैभन्दा राम्रो प्रदर्शन प्रदेश मुख्य महान्यायाधिवक्ता कार्यालयले गरेको छ, जसले ६८.४३ प्रतिशत बजेट उपयोग गरेको छ। त्यसपछि प्रदेशसभा सचिवालयले ४३.६९ प्रतिशत खर्च गर्दै दोस्रो स्थानमा रहेको छ। यता, संस्कृति तथा पर्यटन मन्त्रालयले भने सबैभन्दा कम १६.४३ प्रतिशत बजेट मात्र खर्च गर्न सकेको छ।
सूचना अधिकारी सञ्ज्यालका अनुसार आर्थिक वर्षको सुरुमा प्रायः चालु खर्च बढी हुने र पुँजीगत खर्च सुस्त हुने प्रवृत्ति रहँदै आएको छ। कतिपय योजनाहरू केही महिनाअघि मात्रै कार्यान्वयनमा आएका हुँदा पनि पुँजीगत खर्चमा कमी देखिएको बताइएको छ।
बागमती प्रदेशको नौ महिनामा ३२.५१% मात्र बजेट खर्च, पुँजीगत खर्चमा सुस्तता
यो खबर पढेर तपाईलाई कस्तो महसुस भयो ?
0%
0%
0%
0%
0%
0%
