एन आई सी एशिया बैङ्कले आफ्नो संस्थागत सामाजिक उत्तरदायित्व अन्तर्गत मुलुकभरका विभिन्न जिल्लाका सामुदायिक विद्यालयहरूमा निर्माण गरेका भवनहरू मध्ये दुई विद्यालयमा पुस्तकालय समुद्घाटन गरेको छ । विद्यार्थीहरूलाई आवश्यक शैक्षिक सामग्रीहरू उपलब्ध गराई अध्ययन अध्यापनमा सहयोग गर्न र विद्यालयमा उत्कृष्ट शैक्षिक वातावरण निर्माणार्थ सम्बन्धित विद्यालय एवं स्थानीय तहको सक्रिय सहभागितामा बैङ्कले निर्माण गरेका उक्त पुस्तकालय भवनहरूमा पुस्तकालय समुद्घाटन गरिएको छ ।
बैङ्कद्वारा कोशी प्रदेशको झापा जिल्ला स्थित बुद्धशान्ती गाउँपालिका–२ मा अवस्थित आदर्श माध्यमिक विद्यालय र सोही जिल्लाको गौरीगञ्ज गाउँपालिका–३ मा अवस्थित गौरीगञ्ज माध्यमिक विद्यालयलाई हस्तान्तरण गरेका पुस्तकालय भवनमा यही २०८१ असोज ४ गते स्थानीय तह, विद्यालय र बैङ्कका प्रतिनिधिहरूको उपस्थितिमा पुस्तकालय समुद्घाटन गरिएको छ । आदर्श माध्यमिक विद्यालयको पुस्तकालय समुद्घाटन समारोहमा बुद्धशान्ती गाउँपालिकाका अध्यक्ष मनोज प्रसाईँ र गौरीगञ्ज माध्यमिक विद्यालयको पुस्तकालय समुद्घाटनमा गौरीगञ्ज गाउँपालिकाका अध्यक्ष फूलबती राजवंशीको उपस्थिति रहेको थियो भने उक्त दुवै कार्यक्रममा यस बैङ्कका कोशी प्रदेश प्रमुख दिवाकर भट्टराई र सम्बन्धित विद्यालयका प्रतिनिधिहरू लगायतको उपस्थिति रहेको थियो । यी पुस्तकालय सञ्चालनमा आएसँगै उक्त विद्यालयका करिब २५०० विद्यार्थी तथा शिक्षक/शिक्षिकाहरू प्रत्यक्षता लाभान्वित भएका छन् । यसअघि बैङ्कले सुदूरपश्चिम प्रदेशको कैलाली जिल्ला स्थित जोशीपुर गाउँपालिका–१ मा अवस्थित मोहन्याल माध्यमिक विद्यालयमा निर्माण गरेको पुस्तकालयको समुद्घाटन भइसकेको छ ।
त्यसै गरी, मधेस प्रदेशको सिराहा जिल्ला स्थित भगवान्पुर गाउँपालिका–१ मा अवस्थित बाला सुन्दरी माध्यमिक विद्यालय र पर्सा जिल्ला स्थित वीरगन्ज महानगरपालिका–१४ मा अवस्थित सिद्धार्थ माध्यमिक विद्यालय, गण्डकी प्रदेशको तनहुँ जिल्ला स्थित बन्दिपुर गाउँपालिका–१ मा अवस्थित पवित्रा माध्यमिक विद्यालय, लुम्बिनी प्रदेशको रुपन्देही जिल्ला स्थित सिकारी गाउँपालिका–४ मा अवस्थित पब्लिक सेकेन्डरी स्कुल र बाग्मती प्रदेशको चितवन जिल्ला स्थित राप्ती नगरपालिका–७ मा अवस्थित वीरेन्द्र आदर्श माध्यमिक विद्यालयको पुस्तकालय भवन निर्माण कार्य सम्पन्न गरेर पुस्तकालय स्थापनाको लागि सम्बन्धित विद्यालयहरूलाई हस्तान्तरण गरिसकेको छ ।
बैङ्कले यी पुस्तकालय भवनहरू निर्माणका लागि भनेर कुल र. २ करोड ५ लाख ३० हजार बजेट विनियोजन गरेको थियो । यी पुस्तकालय भवनहरू निर्माणपछि उक्त विद्यालयहरूमा अध्ययनरत ११ हजारभन्दा बढी विद्यार्थीहरू प्रत्यक्ष रूपमा लाभान्वित हुनेछन् भने विद्यालयमा अत्यावश्यक पुस्तकालय व्यवस्थापन गराई विद्यार्थीहरूलाई पुस्तक पढ्न र अन्य शैक्षिक सिकाइका सामग्रीहरूमा पहुँच भई उनीहरूको शैक्षिक गुणस्तर बढ्ने एवं व्यक्तित्व विकासमा ठुलो सहयोग पुग्ने विश्वास बैङ्कले लिएको जनाएको छ ।
एन आई सी एशिया बैङ्कद्वारा निर्माण गरिएका सामुदायिक विद्यालयका पुस्तकालय भवनमा पुस्तकालय समुद्घाटन
यो खबर पढेर तपाईलाई कस्तो महसुस भयो ?
0%
0%
0%
0%
0%
0%
