नेपाल उद्योग वाणिज्य महासङ्घका अध्यक्ष चन्द्रप्रसाद ढकालले ‘मेड इन नेपाल’ अभियानलाई थप सशक्त बनाउन नेपाल युवा उद्यमी मञ्चका सदस्यहरूलाई आग्रह गर्नुभएको छ ।
नेपाल युवा उद्यमी मञ्चको शुक्रवार काठमाडौँमा भएको २० औँ वार्षिक साधारण सभालाई विशेष अतिथिका रूपमा सम्बोधन गर्दै ढकालले करिब १५ वर्षअघि नेपाल युवा उद्यमी मञ्चले सुरु गरेको ‘मेड इन नेपाल’ अभियान धेरै संस्थाहरूको लागि प्रेरणाको स्रोत बनेको बताउनुभयो ।
ढकालले नेपाल उद्योग वाणिज्य महासङ्घको युवा सङ्गठनका रूपमा नेपाल युवा उद्यमी मञ्चले धेरै क्षेत्रमा नेतृत्व गरेकोमा प्रशंसा गर्नुभयो । उहाँले नेपाल उद्योग वाणिज्य महासङ्घको प्रतिष्ठा बढाउन नेपाल युवा उद्यमी मञ्चका सदस्यहरूले गरेको कामको प्रशंसा पनि गर्नुभयो ।
नेपाल उद्योग वाणिज्य महासङ्घको पहलमा सरकारले स्टार्टअप नीति पारित गरेको ढकालले भेलालाई जानकारी दिनुभयो । ढकालले नेपाल उद्योग वाणिज्य महासङ्घले स्टार्टअपलाई कानुनमा परिभाषित गर्न सफल भएको बताउनुभयो । नेपाल युवा उद्यमी मञ्चका सदस्यहरूले उद्यमशीलता प्रवर्द्धनमा विशेष भूमिका खेल्नेमा आफू विश्वस्त रहेको ढकालले बताउनुभयो ।
नेपाल उद्योग वाणिज्य महासङ्घले महासङ्घको विधान संशोधनको मस्यौदा कार्यसमितिबाट पारित गरेको र नेपाल युवा उद्यमी मञ्चको अध्यक्ष पदेन रूपमा कार्यकारिणी समिति सदस्य रहने व्यवस्था समावेश गरिएको ढकालले जानकारी दिनुभयो । यसमा सदस्यताका लागि केही व्यवस्था गर्नुपर्ने बताउँदै उहाँले आगामी विशेष साधारण सभाले पारित गर्ने र नेपाल युवा उद्यमी मञ्चको नेतृत्व महासङ्घको नेतृत्वमा पनि पुग्नेमा आफू विश्वस्त रहेको बताउनुभयो ।
देशको अर्थतन्त्रका बारेमा बोल्दै ढकालले प्रधानमन्त्री, अर्थमन्त्री, गृहमन्त्री र उद्योग, वाणिज्य तथा आपूर्ति मन्त्रीसँग भेटघाट गरेको बताउनुभयो । निजी क्षेत्रको मनोबल उकास्न काम गर्न सरकारलाई आग्रह गरेको र सरकारले महासङ्घको सुझावहरू सकारात्मक रूपमा लिएको बताउनुभयो ।
