अर्थतन्त्रका आन्तरिक तथा बाह्य सूचकहरू सकारात्मक देखिएको भए पनि अझै व्यावसायिक वातावरण निर्माण हुन भने सकिरहेको छैन । समग्र अर्थतन्त्रको असर घरजग्गा कारोबारमा पनि उत्तिकै देखिएको छ । केही सुधारका सङ्केतहरू देखिए पनि घरजग्गामा आशातीत उपलब्धि हासिल हुन सकिरहेको छैन ।
कुन आर्थिक वर्षमा कति कारोबार ?
गएको दुई वर्षको तथ्याङ्क हेर्दा २०७९ साउनदेखि २०८० वैशाख १५ सम्म ९ लाख ४९ हजार ८ घरजग्गाहरूको कारोबार भएको छ भने २०८० साउनदेखि २०८१ वैशाख १५ गतेसम्म ११ लाख ३९ हजार ११४ घरजग्गाहरूको कारोबार भएको छ । अर्थात् २०८० साउनदेखि २०८१ वैशाख १५ गतेसम्ममा गत वर्षको तुलनामा १ लाख ९० हजार १०६ बढी घरजग्गाहरूको कारोबार भएको र त्यसबाट रु ५ अर्ब १० करोड रुपैयाँ बराबरको राजस्व वृद्धि भएको देखिन्छ ।
गएको चार आर्थिक वर्षहरूको कारोबार स्थिति
लिखत पारितका हिसाबले हेर्दा आव २०७६/७७ मा १२ लाख १२ हजार २३० घरजग्गा लिखत पारित हुँदा २६ अर्ब ३७ करोड ६८ लाख राजस्व सङ्कलन भएको थियो भने आव २०७७/७८ मा १७ लाख २८ हजार १४० घरजग्गा कारोबार हुँदा ५३ अर्ब सात करोड १५ लाख राजस्व सङ्कलन भएको थियो ।
त्यस्तै आव २०७८/७९ मा १८ लाख १४ हजार ७३९ घरजग्गा कारोबार हुँदा रु ६८ अर्ब १८ करोड ५९ लाख राजस्व सङ्कलन भएको थियो भने आव २०७९/८० मा झन्डै २६ प्रतिशतले घटेर रु १३ लाख ३६ हजार छ सय ३३ घरजग्गा कारोबार हुँदा ३७ अर्ब ७५ करोड ८८ लाख राजस्व सङ्कलन भएको थियो ।
