घोराही सिमेन्ट इण्डष्ट्री लिमिटेडले वैशाख १९ गते (आज) देखि प्रिमियममा आइपिओ विक्री खुल्ला गरेको छ । कम्पनीको अनुसार योग्य आवेदकले (आयोजना प्रभावित क्षेत्रका बासिन्दाले) दरखास्त दिनुपर्ने न्यूनतम कित्ता १० शेयर र दरखास्त दिन पाउने अधिकतम कित्ता १ लाख कित्ता सम्म तोकेको छ भने वैदेशिक रोजगारीमा रहेका नेपालीहरूले दरखास्त दिनुपर्ने न्यूनतम कित्ता १० शेयर र दरखास्त दिन पाउने अधिकतम कित्ता ७ लाख ५४ हजार ६६१ कित्ता तोकेको छ।

कम्पनीको जारी पुँजीको २० प्रतिशतले हुन आउने रकम बराबरको ७९ लाख ४३ हजार ८०१ कित्ता मध्ये सार्वजनिक निष्कासनको ५ प्रतिशत तथा जारी पुँजीको १ प्रतिशतले हुन आउने रकम बराबरको अङ्कित मूल्य रु. १०० मा प्रिमियम बापत रु. ३०० थप गरी प्रति शेयर रु. ४०० दरको ३ लाख ९७ हजार १९० कित्ता उद्योग प्रभावित क्षेत्रका अर्थात् दाङ जिल्लाको घोराही उप-महानगरपालिका वडा नं. १, २, ३, ४, १४, १५, १७, १८, १९ दाङ जिल्ला, बंगलाचुली गा.पा. वडा नं. ३, ४ र रोल्पा जिल्ला त्रिवेणी गा.पा. वडा नं. ३, ४ का बासिन्दाहरूका लागि छुट्टाइएको र सो स्थानीय बासिन्दाहरूका लागि छुट्टाइएको शेयरमा पूर्ण रूपमा आवेदन पर्न नआएमा बाँकी रहेको शेयर समेत सर्वसाधारणमा जारी शेयरमा थप गरी सोही अनुपातमा सार्वजनिक निष्कासनको १० प्रतिशत तथा जारी पुँजीको १.९० प्रतिशतले हुन आउने रकम बराबरको अङ्कित मूल्य रु. १०० मा प्रिमियम बापत रु. ३३५ थप गरी प्रति शेयर रु. ४३५ को दरले ७ लाख ५४ हजार ६६१ कित्ता शेयर नेपाल सरकारको सम्बन्धित निकायबाट श्रम स्वीकृति प्राप्त गरी विदेशमा बसी रोजगारी गरिरहेका नेपालीहरूको लागि आइपिओ विक्री गर्न लागेको हो।

सो कम्पनीको साधारण शेयर आयोजना प्रभावित क्षेत्रका बासिन्दाहरूको लागि निष्कासन बन्द हुने मिति (छिटोमा) जेठ ०२ गते रहेको छ। उक्त अवधिभित्र माग बमोजिम आवेदन नपरेमा ढिलोमा जेठ १७ गते सम्म आवेदन पेस गर्न सक्ने कम्पनीले जनाएको छ। त्यसै गरी वैदेशिक रोजगारीमा रहेका नेपालीहरूको लागि साधारण शेयरको निष्कासन बन्द हुने मिति जेठ ०२ गते रहेको कम्पनीले जनाएको छ।

कम्पनीको प्रिमियममा आइपिओ खरिद गर्नको निम्ति आवेदकले नेपाल धितोपत्र बोर्डबाट अनुमति लिई आस्वा सेवामा सहभागी बैङ्क तथा वित्तीय संस्थाहरू तथा सिडिएस एन्ड क्लियरिङ्ग लिमिटेडबाट निर्माण गरिएको सफ्टवेयर "मेरो सेयर" अनलाइन प्रयोग गरी सी- आस्वा प्रणाली मार्फत आवेदन पेस गर्न सक्नेछन्।

सो कम्पनीको धिताेपत्र निष्कासन तथा बिक्री प्रबन्धक हिमालयन क्यापिटल लिमिटेड र नबिल इन्भेष्टमेन्ट बैङ्किङ लिमिटेड रहेका छन् ।