चालु आर्थिक वर्षको भाद्र महिनासम्ममा हाल नेपालमा सञ्चालनमा रहेका जम्मा १९ जीवन बीमा कम्पनीहरूले कुल २६ अर्ब ३ करोड रुपैयाँ बीमा शुल्क सङ्कलन गरेका छन् । औसतमा जीवन बीमा कम्पनीहरूले १ अर्ब ३७ करोड रुपैयाँ बीमा शुल्क आर्जन गर्दा ४ जीवन बीमा कम्पनीहरूको बीमा शुल्क आर्जन सोही वर्गका संस्थाहरूको औसतभन्दा धेरै रहेको छ भने १५ यस्ता जीवन बीमा कम्पनीको बीमा शुल्क आर्जन औसतभन्दा कम रहेको देखिएको छ।
चालु आर्थिक वर्षको भाद्रसम्ममा सर्वाधिक बीमा शुल्क आर्जनमा नेपाल लाइफकाे प्रभुत्व :
चालु आर्थिक वर्षको भाद्रसम्ममा नेपाल लाइफ इन्स्योरेन्सले सोही वर्गका संस्थाहरू मध्ये सर्वाधिक बीमा शुल्क आर्जन गरेको छ। इन्स्योरेन्सले ७ अर्ब ६२ करोड रुपैयाँ अधिक बीमा शुल्क सङ्कलन गरेको देखिन्छ। त्यस्तै, नेशनल लाइफले ३ अर्ब २३ करोड रुपैयाँ, एलआइसी नेपालले ३ अर्ब १९ करोड रुपैयाँ र युनियन लाइफले १ अर्ब ४० करोड रुपैयाँ बीमा शुल्क आर्जन गर्दै औसतभन्दा धेरै बीमा शुल्क आर्जन गर्न सफल भएको देखिन्छ।
त्यस्तै, एशियन लाइफले १ अर्ब २१ करोड रुपैयाँ, सिटिजन लाइफले १ अर्ब ६ कराेड रूपैयाँ, सूर्या लाइफले ९६ करोड ५८ लाख रुपैयाँ, मेट लाइफले ९२ करोड ९० लाख रुपैयाँ, राष्ट्रिय बीमा संस्थानले ८३ करोड ८८ लाख रुपैयाँ, प्राइम लाइफले ७७ करोड ८० लाख रुपैयाँ र सन नेपाल लाइफले ७० करोड ३९ लाख रुपैयाँ बीमा शुल्क आर्जन गरेका छन् ।
यता, महालक्ष्मी लाइफले जीवन बीमा संस्थाहरू मध्येको सर्वाधिक कम बीमा शुल्क सङ्कलन गरेको देखिन्छ। उक्त जीवन बीमाले २७ करोड ९२ लाख रुपैयाँ बीमा शुल्क सङ्कलन गर्दा, सानिमा लाइफले ३७ करोड ४१ लाख रुपैयाँ, प्रभु लाइफले ३९ करोड ८० लाख रुपैयाँ, रिलायन्स लाइफले ५२ करोड ८५ लाख रुपैयाँ, गुराँस लाइफले ५८ करोड ५१ लाख रुपैयाँ, रिलायबल नेपालले ५९ करोड ६ लाख रुपैयाँ, आइएमई लाइफले ६३ करोड १९ लाख रुपैयाँ र ज्याेति लाइफले ६९ करोड ३२ लाख रुपैयाँ बीमा शुल्क आर्जन गरेको तथ्याङ्कले देखाएको छ ।
नेपालमा सञ्चालनमा रहेका जम्मा १९ जीवन बीमा कम्पनीहरूकाे चालु आर्थिक वर्षको भाद्र महिनासम्म आइपुग्दा कुल सक्रिय बीमालेख सङ्ख्या १ कराेड ४० लाख १४ हजार ८६६ रहेकाे छ ।
