ज्ञानमाण्डू। केन्द्रीय बैङ्कले सार्वजनिक गरेको तथ्याङ्क अनुसार वैदेशिक रोजगारीका लागि गएका नेपालीहरूले पठाउने विप्रेषण आप्रवाह (रेमिटेन्स) चालु आर्थिक वर्षको फागुन सम्मको अवधिमा १.७ प्रतिशतले घटेर जम्मा ६ खर्ब ३१ अर्ब १९ करोड रुपैयाँ कायम भएको छ भने फागुन महिनामा ९१ अर्ब ७ कराेड रेमिटेन्स थप भित्रिएको छ। अघिल्लो आर्थिक वर्षको सोही अवधिमा भने विप्रेषण आप्रवाह ८.७ प्रतिशतले वृद्धि भएको थियो ।
चालु आर्थिक वर्षको फागुन अन्त्यसम्म आइपुग्दा अमेरिकी डलरमा विप्रेषण आप्रवाह ३ प्रतिशतले कमी आई ५ अर्ब २८ करोड पुगेको नेपाल राष्ट्र बैङ्कले जनाएको छ । अघिल्लो आर्थिक वर्षको सोही अवधिमा अमेरिकी डलरमा विप्रेषण आप्रवाह ५ प्रतिशतले बढेको थियो ।
समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको सङ्ख्या उल्लेख्य रूपमा वृद्धि भई २,२७,९०० पुगेको छ । अघिल्लो आर्थिक वर्षको सोही अवधिमा यस्तो सङ्ख्या ८२.९ प्रतिशतले घटेको थियो । त्यसै गरी, वैदेशिक रोजगारीका लागि पुनः श्रम स्वीकृति लिने नेपालीको सङ्ख्या समीक्षा अवधिमान २४०.९ प्रतिशतले वृद्धि भई १,७८,२६२ पुगेको छ । अघिल्लो आर्थिक वर्षको सोही अवधिमा यस्तो सङ्ख्या ७०.२ प्रतिशतले घटेको थियो ।
समीक्षा अवधिमा खुद ट्रान्सफर २ प्रतिशतले कमी आई ७०४ अर्ब ३३ करोड रुपैयाँ कायम भएको छ । अघिल्लो आर्थिक वर्षको सोही अवधिमा यस्तो ट्रान्सफर ७.२ प्रतिशतले बढेको थियो।
स्रोत: नेपाल राष्ट्र बैङ्क
