तनहुँको व्यास नगरपालिका–५ निवासी मोहनकुमार श्रेष्ठले भिमादस्थित मिछुर्लुङमा रहेको मगर लाफा भिलेजमा पुगेर एक रात बिताउनुभयो । समुन्द्री सतहबाट करिब आठ सय मिटरमा रहेको भिमाद नगरपालिका–५ मिछुर्लुङस्थित मगर लाफा भिलेजमा एक रात बिताउँदा आनन्दको महसुस भएको उहाँ सुनाउनुहुन्छ ।

उहाँले भन्नुभयो, “पृथ्वीराजमार्गबाट नजिक रहेको यो ठाउँ, यहाँबाट देखिने दृश्यले लोभ्यायो । कोलाहल वातावरणबाट मुक्त हुन एक पटक जानै पर्ने रहेछ लाफा भिलेज ।” व्यास नगरपालिका–२ निवासी अञ्जनकुमार श्रेष्ठलाई पनि यस ठाउँले लोभ्यायो । यहाँको हावापानी, देखिने दृश्यहरू राम्रो लागेको उहाँको भनाइ छ । उहाँले भन्नुभयो, “परिवारसँगै आएर एक रात बिताउन पनि यो ठाउँ उपयुक्त लाग्यो ।”

पृथ्वीराजमार्गअन्तर्गत तनहुँको खैरेनीटारबाट भिमाद हुँदै मिर्छुलुङ पुगिन्छ । खैरेनीटारबाट आठ किलोमिटर भिमाद बजार र त्यहाँबाट चार किलोमिटर यात्रा गरेपछि मिछुर्लुङ गाउँ पुग्न सकिन्छ । मिछुर्लुङ गाउँसँगै रहेको मगर भिलेज रिसोर्ट यति बेला आन्तरिक पर्यटकको गन्तव्य स्थलका रूपमा विकास भइरहेको छ ।

सोही ठाउँ निवासी पत्रकारसमेत रहनुभएका प्रताप रानामगरले सञ्चालनमा ल्याउनुभएको मगर भिलेज रिसोर्ट यति बेला पर्यटकीय गन्तव्य स्थलका रूपमा विकसित हुन थालेको छ । उक्त भिलेजमा दैनिक जसो आन्तरिक पर्यटकको चहलपहल बढ्दै गएको छ ।

मगर भिलेज पर्यटकीय तथा अध्ययन केन्द्रका रूपमा विकास हुन थालेको सञ्चालक रानामगरले जानकारी दिनुभयो । उहाँले भन्नुभयो, “प्रकृति, संस्कृति र मगर संस्कारलाई प्रवर्द्धन गर्दै मगर भिलेज रिसोर्ट सञ्चालनमा छ । यहाँ दिनदिनै आउने पर्यटकको सङ्ख्या बढ्दो छ ।” रानामगरका अनुसार प्रकृतिको सुन्दर दृश्यावलोकन, मगरको संस्कार र संस्कृति अध्ययन गर्न आन्तरिक पर्यटक आउने गरेका छन् ।

रानामगरले भन्नुभयो, “मगर संस्कृतिको अध्ययनका लागि जिल्ला तथा जिल्ला बाहिरबाट विद्यार्थी, सहकारी सङ्घसंस्था लगायतबाट सर्वसाधारण आउनुहुन्छ, यहाँको मनोरम दृश्य हेरेर मोहित भएर फर्किनुहुन्छ ।”

मगर भिलेज रिसोर्टमा रहेको घुमाउने र खुर्पेटोले यहाँ पुग्ने सर्वसाधारणको ध्यान खिच्ने गरेको छ । उहाँले भन्नुभयो, “आजभोलि घुमाउने घर कमै मात्रामा देख्न पाइन्छ, हामीले घुमाउने घर बनाएर राखेका छौँ, घरअघि खुर्पेटो पनि छ । पर्यटक घुमाउने घर र खुर्पेटोमा तस्बिर खिचाउन लालयीत देखिनुहुन्छ ।”

लाफा भिलेजमा ढिँकीजाँतोजस्ता पुराना सामग्री राखिएको छ । अहिलेका पुस्तालाई पुरातात्त्विक तथा धार्मिक महत्वका सामग्रीबारे बुझाउन विभिन्न सामग्री राखिएको र अहिले त्यही हेर्न विद्यालयबाट पनि विद्यार्थी आउने गरेको रानामगर बताउनुहुन्छ । यहाँ पुगेका पाहुनालाई अर्ग्यानिक खाना खुवाउने व्यवस्था मिलाइएको छ । भिलेजमा विभिन्न गीतको छायाङ्कनसमेत हुने गरेको छ ।

यहाँ दृश्यावलोकन केन्द्रसमेत बनाइएको छ । ग्रामीण पर्यटन प्रवर्द्धन गर्ने उद्देश्यसहित यहाँ दृश्यावलोकन स्तम्भ (भ्यूटावर) निर्माण गरिएको हो । देश तथा विदेशमा रहेका नेपालीबाट सङ्कलन गरिएको रकमबाट दृश्यावलोकन स्तम्भ निर्माण सम्पन्न भएको हो ।

मिछुर्लङमा जन्मेर हाल बेलायतमा रहनुभएका महेन्द्र आलेको परिकल्पनामा दृश्यावलोकन स्तम्भ निर्माण गरिएको थियो । कूल रु ३८ लाख चार हजार नौ सयको लागतमा दृश्यावलोकन स्तम्भ निर्माण गरिएको बताइएको छ ।

मगर समुदायको कौरा, झ्याउरे, अर्ग्यानिक परिकार मिछुर्लुङको विशेषता हो । प्राकृतिक सौन्दर्यताले भरिपूर्ण मिछुर्लुङमा झरना पनि छ । उक्त झरनामा एक पटक क्यानोनिङसमेत सञ्चालन गरिसकिएको छ ।