यसपालि बडादसैँको अवसरमा सर्वसाधारणले नयाँ बैंक नोट साट्न नपाउने भएका छन्। नेपाल राष्ट्र बैंकका अनुसार दसैँमा सर्वसाधारणले सुकिला नोट मात्रै साट्न पाउने व्यवस्था गरिएको छ।
राष्ट्र बैंकले जारी गरेको सूचनाअनुसार सुकिला नोट भदौ २९ देखि असोज १० गतेसम्म साट्न सकिनेछ। थापाथलीस्थित मुद्रा व्यवस्थापन विभागको कार्यालयसहित विराटनगर, जनकपुर, वीरगन्ज, पोखरा, सिद्धार्थनगर, नेपालगन्ज र धनगढीमा रहेका प्रदेश कार्यालयबाट पनि सुकिला नोट साट्न सकिने व्यवस्था गरिएको छ।
त्यस्तै, बैंक तथा वित्तीय संस्थाका शाखा कार्यालयहरूबाट पनि सर्वसाधारण र संघसंस्थाले बैंकिङ कारोबार समयमै सुकिला नोट साट्न सक्नेछन्।
